Traganarrua kofradia sortu dute Intxaurrondoko lagunek

|
2014-08-05
|
0

traganarrua-logoa Aupa Piratak! Albiste zoragarriak! Aste Nagusi Pirata Donostia osora zabalduz joango dela dirudi, lehenik Ubarroiak kofradia Grosen, gero Filibusteroak Antiguan, eta orain Intxaurrondoko piratek Traganarrua kofradia sortu dute! Animatu zuek ere! Hemen beren aurkezpen testua eta bideoa. Aste Nagusirako prestatu duten egitaraua hemen, eta azpian bideoa eta beren azalpena: egitaraua2014 Traganarrua kofradia sortu da:  

Traganarrua, Tragarroia, Tornadoa, Mangera, Trabañarro, Tronpa… Itsas jeinuak izendatzeko hamaika hitz ditugu euskaldunok. Haize eta ur zurrunbilo ikaragarriak, mendeetan zehar marinel eta arrantzaleen amesgaizto izan dira, baita Piratenak ere. Traganarruaren antzera, bazterrak nahastu eta festa Donostiako bazter urrunenetara eramateko asmoz sortu gara. Gu ere festazaleak gara eta Jaia Donostiako txoko berezienetako batera ekarriko dugu, Intxaurrondora. Intxaurrondo, beste askoren antzera, ahaztutako auzoa da hiriburuan. Periferikoa, zentroarekiko urruna. Auzo Periferikook normalean ditugun arazoak Aste Nagusian areagotu egiten dira, jendez hustu egiten zaizkigu  kaleak, uholdetan jaisten gara jai-gune nagusietara, mareak behera egiten du,… Ukatu egiten zaigu gure auzoan festaz gozatzeko aukera. Dena ilun geratzen da, hilda. Baina marea gora dator! Badator enbata! Bagatoz Intxaurrondotarrok Traganarru eta guzti! Donostiako festak Intxaurrondora iritsiko dira: Piratok ekarriko ditugu. Ez izozki eta suzirien festak, ez da gurea marko inkonparablea. Guk eraiki eta egingo dugu gure festa: Intxaurrondotarrok, Intxaurrondon eta denentzat. Haizea hasi da harrotzen, itsasoa ari da oldartzen…

IDATZI IRUZKINA